TÜRKPA DİM-yə nail olunmasında parlamentlərarası əməkdaşlıq üzrə İkinci Qlobal Forumda iştirak edib

2023-cü ilin 30 noyabr tarixində Baş katibin müavini vəzifəsini icra edən Sakı Sadıkovun başçılıq etdiyi TÜRKPA nümayəndə heyəti Daşkənd şəhərində Özbəkistan Respublikasının Ali Məclisi, BMT-nin Özbəkistandakı Nümayəndəliyi, ATƏT-in Özbəkistandakı Nümayəndəliyi və "Acted" qeyri-hökumət təşkilatının birgə təşkil etdiyi Dayanıqlı İnkişaf Məqsədlərinə nail olunmasında parlamentlərarası əməkdaşlıq üzrə İkinci Qlobal Forumda iştirak edib. Azərbaycan, Qazaxıstan, Qırğızıstan, Türkiyə, Özbəkistan, Belarus, Çin, Xorvatiya, Rusiya, Tacikistan və İspaniyadan olan parlamentarilər, parlamentlərarası və beynəlxalq təşkilatların, qeyri-hökumət təşkilatlarının nümayəndələri, nüfuzlu ekspertlər və mütəxəssislər tədbirə qatılıblar. Özbəkistan Respublikası Ali Məclisi Senatının sədri Tənzilə Narbayeva Özbəkistan Respublikasının Prezidenti Şavkat Mirziyoyevin forum iştirakçılarına müraciətini oxuyub. Baş katib Mehmet Süreyya Er açılış mərasimində videomüraciətlə çıxış edib. Açılış mərasimində həmçinin Özbəkistan Respublikası Ali Məclisi Senatının sədri Tənzilə Narbayeva, Özbəkistan Respublikası Ali Məclisi Qanunvericilik Palatasının spikeri Nurdinjon Ismoilov, BMT-nin Özbəkistandakı rezident əlaqələndiricisi vəzifəsini icra edən Konsuelo Vidal Brüs şəxsən çıxış edib, Parlamentlərarası İttifaqın Baş katibi Martin Çunqonq, BMT-nin İqtisadi və Sosial Şurasının prezidenti Paula Narvez, ATƏT Parlament Assambleyasının prezidenti Pia Kauma, Rusiya Federasiyası Federal Məclisinin Federasiya Şurasının sədri, MDB-nin Parlamentlərarası Assambleyasının sədri Valentina Matviyenko və Avropa Şurası Parlament Assambleyasının prezidenti Tini Koks isə videomüraciət ünvanlayıblar. Baş katib Mehmet Süreyya Er öz çıxışında Dayanıqlı İnkişaf Məqsədlərinə (DİM) nail olunmasında parlamentlərin və parlamentarilərin mühüm və özünəməxsus rolunu vurğulayıb. O, TÜRKPA üzv dövlətlərinin DİM-yə nail olunmasına böyük əhəmiyyət verdiyini qeyd edib və TÜRKPA-nın 2030-cu il Dayanıqlı İnkişaf Gündəliyinin məqsədlərinə bundan sonra da töhfə verməyə sadiqliyini və qətiyyətini bir daha təsdiq edib. Baş katib regionda dayanıqlı inkişafa nail olunmasında hərəkətverici qüvvələrdən biri olan ölkənin gələcək inkişafında Özbəkistan Respublikasının Prezidenti Şavkat Mirziyoyevin rəhbərliyi ilə həyata keçirilən davam edən islahatların mühüm rolunu vurğulayıb və yaxın gələcəkdə Özbəkistan Parlamentinin Assambleyaya tamhüquqlu üzvlüyünə inamını ifadə edib. Özbəkistan Respublikası Ali Məclisi Senatının sədri Tənzilə Narbayeva DİM-yə nail olunmasında parlamentlər, hökumətlər və vətəndaş cəmiyyəti təsisatları arasında praktiki əməkdaşlıq yaradılması ehtiyacına toxunub. Özbəkistanda DİM-yə nail olunması üçün yeni mexanizmin tətbiq olunduğu, hüquqi və institusional islahatların həyata keçirildiyi vurğulanıb. Milli məqsəd və vəzifələrin həyata keçirilməsinə nəzarət etmək üçün parlament komissiyası yaradılmış, habelə DİM-yə nail olunmasında maraqların tarazlaşdırılmasının səmərəli mexanizmi və bu sahədə parlament nəzarəti və ictimai nəzarət formalaşdırılmışdır. Forum "2030-cu il Qlobal Gündəliyinin səmərəli həyata keçirilməsinin təşviq edilməsində parlamentin və parlamentlərarası əməkdaşlığın rolu", "DİM-yə nail olunması yönündə irəliləyişin sürətləndirilməsində gender-spesifik və gənclər siyasəti", "2030-cu il Dayanıqlı İnkişaf Gündəliyinin həyata keçirilməsində parlament və vətəndaş cəmiyyəti arasında qarşılıqlı fəaliyyət" mövzularında üç sessiyanı əhata edib. Forum DİM-yə nail olunmasında parlamentlərarası əməkdaşlığın mühüm aspektlərini əhatə edən Daşkənd Kommunikesinin qəbul edilməsi ilə başa çatıb.