TÜRKPA COP29 tədbirlərində iştirak edir

2024-cü il noyabrın 13-də Baş katibin müavini Sakı Sadıkov 2024-cü ilin 11-22 noyabr tarixlərində Bakıda keçirilən Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində Qırğızıstanın Azərbaycan və Monqolustan ilə birgə təşkil etdiyi “Dağ gündəliyinin təşviqi, dağlar və iqlim dəyişmələri mövzusunun aktuallaşdırılması” mövzusunda Yüksək Səviyyəli Dialoqda iştirak edib. Tədbirdə Qırğız Respublikasının Prezidenti Sadır Japarov, Monqolustan Prezidenti Uxnaaqiyn Xurelsux, Nepal Prezidenti Ram Çandra Paudel, Azərbaycan Respublikasının xarici işlər naziri Ceyhun Bayramov və digər yüksək səviyyəli rəsmilər iştirak ediblər. Prezident Sadır Japarov çıxışında beynəlxalq ictimaiyyəti qlobal istixana qaz emissiyalarına minimal töhfə vermələrinə baxmayaraq iqlim dəyişmələrinə ən həssas olan dağlıq ölkələrə dəstəyi artırmağa çağırıb. Öz növbəsində, nazir Ceyhun Bayramov dağlarda buzlaqların əriməsi, eləcə də bundan qaynaqlanan daşqın və sürüşmələr kimi fəlakətlərin sistemli tədbirlərin qəbulunu tələb etdiyini qeyd edib və dağlıq ərazilərdə yaşayan əhalinin qorunması, habelə həllərin tapılmasında əməkdaşlığın gücləndirilməsi üçün daha böyük səylərin göstərilməsi ehtiyacını bildirib. COP29-un əsas mövzuları istixana qaz emissiyalarının azaldılması üçün tədbirlər, iqlim maliyyələşməsi, enerjidə texnoloji innovasiya, gənc nəslin maarifləndirilməsi və gənclərin iqlim dəyişmələrinə qarşı mübarizəyə yönəlmiş təşəbbüslərinə dəstəkdir. Tədbirdə iştirakının bir hissəsi kimi Sakı Sadıkov “Qırğızıstan: Dayanıqlı dağ inkişafı” ümumi mövzusunda milli pavilyonu, o cümlədən nazirliklər və şöbələrin iştirakı ilə iqlim gündəliyində cari məsələlərə dair təqdimatların keçirildiyi digər ölkələrin pavilyonlarını ziyarət edib. COP29-da 100-dən çox ölkədən liderlər daxil olmaqla, bütün dünyadan 72 000 nəfər iştirak edir. Birləşmiş Millətlər Təşkilatının İqlim Dəyişmələri üzrə Çərçivə Konvensiyası iqlim sisteminə təhlükəli insan müdaxiləsinin qarşısının alınması üçün 1992-ci ilin iyun ayında Rio-de-Janeyroda “Yer kürəsi sammiti”ndə imzalanmış razılaşmadır. Hazırda Konvensiyanın 198 Tərəfi var. Tərəflər Konfransı (COP) Konvensiyanın həyata keçirilməsinə nəzarət edən ali orqandır və Tərəflər başqa qərar qəbul etmədiyi təqdirdə, hər il keçirilir.