TÜRKPA 14-cü Boğaziçi Zirvəsində iştirak edib

TÜRKPA-nın Hüquq məsələləri və beynəlxalq əlaqələr Komissiyasının sədri Osman Mesten və Baş katib Mehmet Süreyya Er İstanbulda keçirilən 14-cü Boğaziçi Zirvəsində iştirak edib. Beynəlxalq Əməkdaşlıq Platforması (UIP) tərəfindən “Gələn əsrin qarşılanması: Problemlər və gözləntilər” mövzusunda təşkil olunmuş tədbirdə biznes, siyasət, akademiya və mədəniyyət daxil olmaqla, müxtəlif sahələrdən liderlər və peşəkarlar iştirak edib. Baş katib Mehmet Süreyya Er Zirvə çərçivəsində təşkil olunan "Türk dünyasının yüzilliyi" adlı paneldə iştirak edib. O, türk birliyi məsələsini müqayisəli perspektivdə müzakirə edib və TÜRKPA-nın ildən-ilə genişlənən və inkişaf edən fəaliyyəti haqqında məlumat verib. Türkiyə Böyük Millət Məclisinin üzvü və TÜRKPA-nın Hüquq məsələləri və beynəlxalq əlaqələr Komissiyasının sədri Osman Mesten eyni paneldə açılış nitqi ilə çıxış edib və Türk əməkdaşlığının qlobal miqyasda əməkdaşlıq institutları kontekstində yerini müzakirə edib. Paneldə həmçinin bu yaxınlarda vəfat etmiş Azərbaycan parlamentinin üzvü Qənirə Paşayevanın xatirəsi yad edilib və onun Türkiyədəki tədbirdə çıxışının videoyazısı iştirakçılara təqdim olunub. UIP İdarə heyətinin üzvü Gözde Dizdarın moderatorluğu ilə keçirilən panel platformanın qurucusu Cengiz Özgencil tərəfindən təşəkkürnamələrin və onların adlarına xatirə meşəsində əkilən ağaclarla bağlı sənədlərin məruzəçilərə təqdim edilməsi ilə başa çatıb. İki gün davam edən 14-cü Boğaziçi zirvəsində beynəlxalq əlaqələr, təhlükəsizlik, iqtisadiyyat, maliyyə, investisiya, bankçılıq, idman, təhsil, enerji, iqlim, ətraf mühit, şəhərçilik, kənd təsərrüfatı, incəsənət, media, rəqəmsal transformasiya, süni intellekt, kibertəhlükəsizlik, arxeologiya, tarix, hüquq və tibb üzrə 30-a yaxın panel keçirilib.