Səfir cənab Akgün və TBMM-nin millət vəkili cənab Ayrım TÜRKPA-nın Baş katibinə nəzakət ziyarəti ediblər

2025-ci il oktyabrın 30-da Türk Dövlətləri Parlament Assambleyasının (TÜRKPA) Baş katibi səfir Ramil Həsən TÜRKPA Beynəlxalq Katibliyində Türkiyə Respublikasının Azərbaycan Respublikasındakı səfiri Birol Akgün və Türkiyə Böyük Millət Məclisinin millət vəkili, Türkiyə-Azərbaycan Dostluq Qrupunun rəhbəri Şamil Ayrım ilə görüşüb. Baş tutan nəzakət ziyarətində cənab Həsən qonaqlara TÜRKPA-nın üzv parlamentlər arasında əməkdaşlığı gücləndirməyə yönəlmiş həyata keçirdiyi qətiyyətli səyləri, son dövrdəki təşəbbüsləri və üzv dövlətlərə edilən rəsmi səfərlər zamanı müzakirə olunan mövzular haqqında məlumat verib. Baş katib türk dövlətlərinin parlamentləri, xarici işlər nazirlikləri və Türk Dövlətləri Təşkilatı (TDT) arasında sinerjinin daha da inkişaf etdirilməsi üçün TÜRKPA-nın təklif və yanaşmalarını bölüşüb. TÜRKPA-nın bütün bu fəaliyyət sahələrindəki işinin Qazaxıstanın hazırkı fəaliyyətdə olan sədrliyi ilə fasiləsiz və uğurla həyata keçirildiyini bildirib. Görüş zamanı Türkiyənin Azərbaycandakı səfiri Birol Akgün Baş katib səfir Ramil Həsəni TÜRKPA-dakı yeni vəzifəsi münasibətilə təbrik edərək, ona fəaliyyətlərində uğurlar arzulayıb. TBMM-nin millət vəkili Şamil Ayrım Baş katib cənab Həsən ilə uzun illərə söykənən dostluqlarına istinad edərək, onu səmimi-qəlbdən təbrik edib. Cənab Ayrım səfir cənab Həsənin türk dünyasına dəyərli xidmətlərinin yenidən TÜRKPA-nın Baş katibi kimi həyata keçirdiyi missiyasında da eyni şəkildə əks olunacağına güclü inamını ifadə edib. Görüşdə həmçinin Baş katibin müavini Muhammet Alper Hayali və komissiya katibi Kadir Yaman iştirak edib.