Özbəkistan Ali Məclisi Senatının sədri TÜRKPA Baş katibini qəbul edib

12 dekabr 2025-ci il tarixində Özbəkistan Respublikası Ali Məclisi Senatının sədri, xanım Tənzilə Narbayeva TÜRKPA-nın Baş katibi səfir Ramil Həsənin rəhbərlik etdiyi nümayəndə heyətini qəbul edib. Tənzilə Narbayeva səfir Ramil Həsəni TÜRKPA-nın Baş katibi seçilməsi münasibətilə səmimi-qəlbdən təbrik edib və Assambleyanın daha da gücləndirilməsində onun dinamik qabiliyyətinə inamını vurğulayaraq onun rəhbərliyi altında TÜRKPA Beynəlxalq Katibliyinə böyük uğurlar və tərəqqi arzulayıb. O, cənab Həsənin TÜRKPA-nın formalaşması və institusional inkişafındakı mühüm rolunu qeyd edərək, onun Assambleyanın təşəkkül mərhələsindən başlayaraq illər ərzində daim fədakarlıq və uzaqgörənliklə töhfə verdiyini vurğulayıb. Türk dövlətlərini birləşdirən ortaq dəyərlər, mədəniyyət və ənənələrə toxunan Senat sədri bu birgə mirasın bütün sahələr üzrə əməkdaşlığın daha da genişlənməsi üçün təbii zəmin yaratdığını bildirib və Özbəkistanın Türk dünyası ailəsində birliyin gücləndirilməsinə sarsılmaz sadiqliyini bir daha təsdiqləyib. O həmçinin qeyd edib ki, Türk dünyası mütləq şəkildə birliyini qoruyub saxlamalıdır, çünki davamlı nailiyyətlər yalnız həmrəylik sayəsində mümkündür. Baş katib Ramil Həsən xanım Narbayevaya TÜRKPA nümayəndə heyətinə göstərilən səmimi və yüksək səviyyəli qəbul üçün təşəkkürünü bildirərək Özbəkistan ilə Türk dünyasının əsrlərdən bəri möhkəm bağlarla birləşdiyini vurğulayıb. O, TÜRKPA üzv dövlətlərinin parlament sədrlərinin salamlarını da Senat sədrinə çatdırıb. Baş katib Özbəkistanın Türk dünyasına verdiyi misilsiz töhfələri qeyd edərək, ölkənin zəngin tarixi irsini və Türk sivilizasiyasının qədim mərkəzlərindən biri olaraq xüsusi statusunu vurğulayıb. O əlavə edib ki, Prezident Şavkat Mirziyoyevin müdrik və strateji rəhbərliyi altında Özbəkistan Türk Dövlətləri Təşkilatında çox fəal mövqe tutur və mühüm təşəbbüslərlə çıxış edir. Baş katib Özbəkistanın qarşıdakı illərdə TÜRKPA-nın fəaliyyətinə də əhəmiyyətli töhfələr verəcəyinə əminliyini ifadə edib. Baş katib TÜRKPA-nın beynəlxalq platformalarda fəaliyyəti və qanunvericiliklərin yaxınlaşdırılması sahəsində rolunun əhəmiyyətini vurğulayaraq 2026-cı ildə Qırğızıstanda keçiriləcək növbəti Plenar Sessiya zamanı Özbəkistanın təşkilata tamhüquqlu üzv kimi qəbul ediləcəyinə dair güclü ümid və inamını ifadə edib. TÜRKPA-nın son dövrdə həyata keçirdiyi fəaliyyətlər barədə məlumat verərək, ATƏT Parlament Assambleyasının 23-cü Payız Sessiyası çərçivəsində TÜRKPA-nın koordinasiya iclasının uğurla keçirildiyini vurğulayan Baş katib, bu iclasın uğuruna töhfə verən Özbəkistan nümayəndə heyətinin iştirakı üçün dərin minnətdarlığını ifadə edib. Baş katib koordinasiya iclasının nəticələrinə dair Yol Xəritəsini, Hesabatı və 2026-cı il üzrə Beynəlxalq Katiblik tərəfindən hazırlanmış İş Planını da təqdim edib. Bu sənədlər üzv parlamentlərin milli maraqlarının müdafiəsi, parlament diplomatiyasının gücləndirilməsi və ortaq prioritetlər üzrə koordinasiyalı fəaliyyəti təmin edən konkret istiqamətləri müəyyənləşdirir. O, həmçinin 30 noyabr 2025-ci ildə Qırğızıstanda keçirilmiş erkən parlament seçkilərinin TÜRKPA Beynəlxalq Seçki Müşahidə Missiyası tərəfindən uğurlu qısamüddətli müşahidəsini də diqqətə çatdırıb. Baş katib Özbəkistanın Türk Dövlətləri Təşkilatındakı fəal siyasətini yüksək qiymətləndirərək, bu fəallığın TÜRKPA çərçivəsində də davam edəcəyinə əminliyini ifadə edib. O bildirib ki, artıq TÜRKPA-nın fəaliyyətlərində aktiv iştirak edən Özbəkistan parlamentinin rəsmi üzvlüyü qardaş ölkələrin parlamentlərini birləşdirən dostluq çevrəsini tam şəkildə tamamlayacaq. Xanım Narbayeva qeyd edib ki, Özbəkistan hələlik rəsmi üzv olmasa da, həm Senat, həm də Qanunvericilik Palatası uzun illərdir TÜRKPA-nın komitə iclasları və Plenar Sessiyalarında ardıcıl və aktiv şəkildə iştirak edir. O, qardaş Özbəkistanın Türk Dövlətlərinə və TÜRKPA-ya xüsusi əhəmiyyət verdiyini vurğulayıb. Senat sədri Türk Dövlətləri Təşkilatı ilə TÜRKPA arasındakı əməkdaşlığın mühüm üstünlüklərinə toxunaraq, ortaq maraqların qorunması və təşviqi, dövlət başçıları tərəfindən qəbul edilmiş qərarların parlamentlərdə operativ icrası və bəzi hallarda çətinliklər yarandıqda parlament nəzarəti mexanizmlərinin tətbiqi kimi imkanların dövlət başçılarının tarixi siyasətinə mühüm dəstək verəcəyini vurğulayıb. O, Özbəkistanın TÜRKPA-ya sarsılmaz dəstəyini bir daha təsdiq edib, ölkəsinin Assambleyanın bütün fəaliyyətlərində onunla yanaşı dayanacağını bildirib. Xanım Narbayeva Özbəkistanın TÜRKPA-nın fəaliyyətində iştirak etməkdən böyük qürur duyduğunu və Assambleyanın Türk dövlətləri arasında əməkdaşlığın gücləndirilməsindəki rolunu yüksək dəyərləndirdiyini ifadə edib. Görüş zamanı TÜRKPA çərçivəsində Özbəkistan parlament nümayəndələrinin səmərəli iştirakı xüsusi vurğulanıb. Qeyd edilib ki, Ali Məclisin hər iki palatasının nümayəndə heyətləri TÜRKPA-nın Plenar Sessiyalarında, komitə iclaslarında və digər tədbirlərində mütəmadi iştirak edirlər. Baş katib Senat sədrinə parlament sədrlərinin illik qeyri-rəsmi görüşlərinin keçirilməsi təşəbbüsü barədə də məlumat verib. O bildirib ki, dövlət başçılarının qeyri-rəsmi zirvə görüşlərinin uğurlu təcrübəsinə əsaslanaraq TÜRKPA sədrlərinin ilk qeyri-rəsmi görüşü 2026-cı ilin aprel ayında İstanbulda keçiriləcək PAİ-nin 152-ci Assambleyası çərçivəsində təşkil ediləcək. Xanım Narbayeva bu təşəbbüsü yüksək qiymətləndirərək, parlament sədrlərinin yalnız ildə bir dəfə deyil, bir neçə dəfə qeyri-rəsmi formatda görüşməsinin vacibliyini vurğulayıb. O qeyd edib ki, bu cür qarşılıqlı təmaslar yalnız TÜRKPA-nın davam edən fəaliyyətlərinin möhkəmləndirilməsinə deyil, həm də bir sıra aktual məsələlərin vaxtında və səmərəli həllinə mühüm töhfə verəcək. Xanım Narbayeva TÜRKPA+ formatı ilə bağlı Baş katibin təşəbbüsünü dəstəklədiyini də bildirərək TÜRKPA-nın Avropa Birliyi, ATƏT Parlament Assambleyası, MDB Parlamentlərarası Assambleyası və digər müvafiq qurumlarla əməkdaşlıq platformalarının daha da inkişaf etdirilməsinin vacibliyini vurğulayıb və bununla da parlament diplomatiyasının, eləcə də TÜRKPA-nın rolu və əhəmiyyətinin ön plana çıxacağını qeyd edib. Görüşün yekununda Türk dövlətləri parlamentləri arasında əməkdaşlığın daha da dərinləşdirilməsi, həmçinin TÜRKPA çərçivəsində keçirilən tədbirlərdə fəal iştirakın təmin edilməsi barədə razılıq əldə edilib. Baş katibi görüşdə onun müavinləri Talqat Aduov və Muhammet Alper Hayali, Komissiya katibi Aynurə Abutalıbova və Protokol xidmətinin rəisi Yadigar Məmmədov müşayiət ediblər. Görüşdə, həmçinin Ali Məclisin Senatının Beynəlxalq əlaqələr, xarici iqtisadi əlaqələr, xarici İnvestisiyalar və turizm komitəsinin sədri Alişer Aqzamxocayev və Elm, təhsil və səhiyyə məsələləri komitəsinin sədri Baxrom Abdullayev iştirak ediblər.