MERCOSUR Parlamentinin üzvü TÜRKPA Katibliyini ziyarət edib

2024-cü il noyabrın 20-də MERCOSUR Parlamentinin (PARLASUR) üzvü Sesilia Nikolini TÜRKPA Katibliyini ziyarət edib və Baş katib Mehmet Süreyya Er ilə görüşüb. Görüşdə əsas diqqət iki parlament təşkilatı arasında əməkdaşlıq zəmininin yaradılmasına yönəlib. Xanım Nikolini TÜRKPA ilə daha sıx əlaqələrin yaradılmasında maraq ifadə edib və birgə səylərin, şübhəsiz ki, hər iki region üçün fayda gətirəcəyini qeyd edib. Qonağı salamlayan Baş katib bu dialoqun iki region arasında əlaqələrin möhkəmləndirilməsində mühüm addım kimi çıxış etdiyini vurğulayıb. Görüş zamanı tərəflər öz təşkilatları haqqında məlumat verib, TÜRKPA və MERCOSUR ölkələri üçün parlamentlərarası əməkdaşlıq mexanizminin yaradılması imkanlarını nəzərdən keçiriblər. Hər iki tərəf dialoqu davam etdirmək və birgə fəaliyyət üçün konkret plan hazırlamaq barədə razılığa gəliblər. PARLASUR (“Parlamento del MERCOSUR” yaxud “MERCOSUR Parlamenti”nin qısaltması) Argentina, Braziliya, Paraqvay, Uruqvay və Venesuela (hazırda iştirakı dayandırılıb) kimi Cənubi Amerika ölkələrini əhatə edən MERCOSUR ticarət blokunun qanunverici orqanıdır. O, blok daxilində siyasi dialoq və regional inteqrasiya üçün platforma kimi xidmət etməsi məqsədilə 2006-cı ildə yaradılıb.