Lefkoşada Türk Qadın Parlamentarilərin 1-ci Zirvə görüşü keçirilib

28-31 may 2025-ci il tarixlərində Şimali Kipr Türk Cümhuriyyətinin (ŞKTC) Lefkoşa şəhərində “Təhsil, mədəniyyət və sahibkarlıq” mövzusunda Türk Qadın Parlamentarilərin 1-ci Zirvə görüşü keçirilib. Zirvə görüşü TÜRKPA-nın himayəsi altında Qadın Parlamentarilər Qrupu çərçivəsində təşkil olunub. Açılış nitqində tədbir iştirakçılarını səmimi salamlayan ŞKTC Məclisinin sədri Ziya Öztürkler Zirvə görüşünün sadəcə bir görüş olmadığını, eyni zamanda Türk dünyasında qadın liderliyinin və həmrəyliyinin artırılmasına sadiqlik nümayiş etdirdiyini vurğulayıb. O, qadınların səlahiyyətlərinin artırılmasının təkcə qadınlar üçün deyil, eləcə də daha ədalətli və dinc cəmiyyətlər qurmaq üçün zəruri olduğunu qeyd edib. Tədbir yüksək səviyyəli rəsmilərin, o cümlədən ŞKTC Məclisinin sədr müavini Fazilet Özdenefenin, TÜRKPA Qadın Parlamentarilər Qrupunun rəhbəri, Azərbaycan Respublikası Milli Məclisinin üzvü Tamam Cəfərovanın, Türkiyə Böyük Millət Məclisinin üzvü, TÜRKPA Qadınlar Qrupunun sabiq rəhbəri Zeynep Yıldızın, ŞKTC-Türkiyə Parlamentlərarası Dostluq Qrupunun sədri Resmiye Eroğlu Canaltay və TÜRKPA Baş katibi Mehmet Süreyya Erin çıxışları ilə davam edib. Natiqlər qismində, həmçinin Kosovo Parlamentinin üzvü Fidan Jilta, Moldova Parlamentinin üzvü İvanna Köksal, Bolqarıstanın Dulovo Bələdiyyəsinin sədri Nevhis Mustafa, Türkiyə Böyük Millət Məclisinin üzvü Asuman Erdoğan, Türkiyə Respublikası milli təhsil nazirinin müavini Celile Eren Ökten, ŞKTC Məclisinin üzvləri İzlem Gürçağ Altuğra və Ayşegül Baybars, Azərbaycan Respublikası Milli Məclisinin üzvləri Gülşən Paşayeva iştirak ediblər. Zirvə görüşündə TÜBİTAK Mərmərə Araşdırma Mərkəzinin prezidenti Burcu Özsoy, Əhməd Yəsəvi adına Beynəlxalq Qazax-Türk Universitetinin rektoru Janar Temirbekova, həmçinin Azərbaycan, Qazaxıstan, Qırğızıstan, Türkiyə və Özbəkistanın aparıcı akademikləri və alimləri iştirak ediblər. Öz çıxışında TÜRKPA Baş katibi Mehmet Süreyya Er qadınların cəmiyyətin formalaşmasında mühüm töhfələrini qeyd edərək, təhsil, mədəniyyət və sahibkarlığın gücləndirilməsinin sütunları kimi əhəmiyyətini vurğulayıb. O, TÜRKPA-nın qadınların liderlik və qərar qəbuletmə prosesində iştirakının dəstəklənməsi istiqamətində öhdəliyini qeyd edərək, inklüziv və möhkəm icmaları inkişaf etdirmək üçün həyata keçirilə bilən strategiyaların rolunu qeyd edib. Zirvə görüşündə “Təhsil vasitəsilə qadınların, ailələrin və cəmiyyətin gücləndirilməsi: Çağırışlar, alternativ həllər və regional əməkdaşlıq”, “Qadınlar mədəni liderlər kimi: Qloballaşan dünyada şəxsiyyətin qorunması və dəyişikliyin təşviq edilməsi” və “Rəqəmsal dövrdə qadın sahibkarlığı: İnnovasiya və iqtisadi iştirakın təşviqi” adlı mövzulara dair 3 plenar sessiyadan ibarət olub. Zirvə görüşü birgə mətbuat konfransı ilə başa çatıb və tədbirin əsas nəticələri mətbuata təqdim edilib. Tədbirin proqramına 30 may 2025-ci il tarixində keçirilmiş bir sıra yüksək səviyyəli görüşlər daxil edilib. Nümayəndə heyəti ŞKTC Prezidenti Ersin Tatar, ŞKTC Məclisinin sədri Ziya Öztürkler və ŞKTC xarici işlər naziri Tahsin Ertuğruloğlu ilə görüşüb. İştirakçılar, həmçinin Barbarlıq Muzeyini və qalalarla əhatə edilmiş Lefkoşa şəhərini ziyarət edib, Səlimiyə məscidi, Böyük Xan və Arasta bazarı kimi mühüm mədəniyyət abidələri ilə tanış olublar. Zirvə görüşündə Baş katib Mehmet Süreyya Eri komissiya katibi Kadir Yaman və Qadın Parlamentarilər Qrupunun icraçı katibi Şahidə Mehdiyeva müşayiət ediblər.