Baş katib Bakıda keçirilən Beynəlxalq Parlament Konfransında iştirak edib

7 dekabr 2024-cü il tarixində Baş katib Mehmet Süreyya Er Azərbaycan Respublikası Milli Məclisinin ev sahibliyində “Parlamentarizm: ənənələr və perspektivlər” mövzusunda Beynəlxalq Parlament Konfransında iştirak edib. Konfrans 13 ölkə parlamentlərindən və beynəlxalq təşkilatlardan 100-ə yaxın nümayəndəni bir araya gətirib. Tədbir qlobal proseslərdə parlamentlərin rolu, parlament ənənələrinin inkişafı, parlament diplomatiyasının potensialı, müasir qlobal çağırışlar kontekstində aparılan müzakirələrin töhfəsi kimi məsələlərə həsr olunub. Tədbiri giriş nitqi ilə açan Milli Məclisin sədri, TÜRKPA-nın fəaliyyətdə olan sədri Sahibə Qafarova konfrans iştirakçılarını salamlayıb. O, parlamentlərin qanunvericilik hakimiyyəti funksiyasını yerinə yetirməklə və dövlətin idarə olunmasında fəal iştirak etməklə, ölkələrin siyasi həyatında oynadığı rolunun danılmaz olduğunu vurğulayıb. Konfransda iştirakçılar tərəfindən Milli Məclisin digər ölkələrin parlamentləri və beynəlxalq təşkilatlarla sıx əməkdaşlığının mövcudluğu qeyd olunub. Bu kontekstdə TÜRKPA-nın təkcə üzv parlamentlərlə deyil, eləcə də digər parlamentlərarası institutlarla dialoqu inkişaf etdirməklə parlament diplomatiyası ilə məşğul olan və bununla da regional əməkdaşlığa töhfə verən mühüm təşkilat kimi əsas rolu vurğulanıb. Baş katib Mehmet Süreyya Er konfransda çıxış edərək Azərbaycan parlamentinin 106-cı ildönümü münasibətilə səmimi təbriklərini çatdırıb. O, üzv dövlətlər arasında davamlı inkişaf və regional inteqrasiyanı təşviq etmək məqsədilə parlamentlərarası dialoqun gücləndirilməsinin vacibliyinə toxunub. Baş katib Milli Məclisin TÜRKPA-nın fəaliyyətinə verdiyi dəstəyi vurğulayaraq, xalqa xidmətdə və demokratik dəyərlərin möhkəmləndirilməsində davamlı uğurlar arzu edib.