8 Noyabr – Zəfər Günü münasibətilə TÜRKPA Baş katibinin mesajı

Türk Dövlətləri Parlament Assambleyası adından və şəxsən öz adımdan Azərbaycan Respublikasının ərazi bütövlüyünün, ədalətin və beynəlxalq hüququn tarixi bərpasını ifadə edən 8 Noyabr – Zəfər Günü münasibətilə Azərbaycan xalqına səmimi təbriklərimi bildirirəm. Bu möhtəşəm Zəfər Azərbaycan xalqının sarsılmaz iradəsinin, birliyinin və milli ruhunun rəmzidir və Azərbaycan xalqının ümummilli lideri Heydər Əliyevin əbədi irsini əks etdirir. Azərbaycan Respublikasının Prezidenti, Ali Baş Komandan cənab İlham Əliyevin müdrik və qətiyyətli rəhbərliyi ilə müzəffər Azərbaycan Ordusunun qazandığı bu böyük Zəfər regionda davamlı sülh və sabitliyin bərqərar olması üçün imkan yaratmış və xalqlarımızı birləşdirən qardaşlıq və həmrəylik ruhunu möhkəmləndirərək, türk dünyasının müasir tarixində şanlı səhifə kimi çıxış edir. Zəfər Günü həmçinin Azərbaycan xalqının sülh, rifah və azad edilmiş ərazilərdə yenidənqurma prosesinə sadiqliyini əks etdirir. Bu gün Azərbaycanın azad edilmiş əraziləri sürətlə dirçəlir və bərpa edilir. Qardaş türk dövlətlərinin azad edilmiş ərazilərdə bərpa və yenidənqurma proseslərində iştirakı əməkdaşlığımızın təməlində duran türk qardaşlığı və həmrəyliyi ruhunun təzahürüdür. TÜRKPA bir daha bu Zəfər uğrunda verilən qurbanlara dərin ehtiramını ifadə edir və türk dünyasında sülh, əməkdaşlıq, sabitlik və rifahın möhkəmləndirilməsinə töhfə verməyə sadiqliyini bir daha təsdiq edir. Biz Azərbaycanın ərazi bütövlüyü uğrunda canlarını fəda edən şəhidləri dərin ehtiramla yad edir, qazilərə möhkəm cansağlığı, Azərbaycana və bütün türk dünyasına davamlı sülh və tərəqqi arzulayırıq. Səfir Ramil Həsən Türk Dövlətləri Parlament Assambleyasının Baş katibi