TÜRKPA Missiyası Qazaxıstan Xarici İşlər Nazirinin müavini ilə görüşüb

13 mart 2026-cı il tarixində Azərbaycan, Qırğızıstan və Türkiyə parlamentəriləri və parlament əməkdaşları, eləcə də TÜRKPA Beynəlxalq Katibliyi nümayəndələrindən ibarət Beynəlxalq Referendum Müşahidə Missiyası Baş katib cənab Ramil Həsən və TÜRKPA hüquq məsələləri və beynəlxalq əlaqələr komissiyasının sədri, Türkiyə Böyük Millət Məclisinin deputatı cənab Osman Mestenin rəhbərliyi altında Qazaxıstan Respublikası xarici işlər nazirinin müavini cənab Alibek Bakayev ilə görüşüb.

Beynəlxalq Referendum Müşahidə Missiyasını salamlayan cənab Bakayev onlara qarşıdakı qısamüddətli müşahidə fəaliyyətində uğurlar arzulayıb. O, missiya üzvlərinə referenduma hazırlıq prosesi barədə məlumat verib və bu mühüm hadisənin Qazaxıstan xalqı üçün əhəmiyyətini vurğulayıb.

Baş katib cənab Ramil Həsən səmimi qəbula görə cənab Alibek Bakayevə təşəkkürünü bildirib və Qazaxıstan xalqına öz xoş arzularını çatdırıb. O, nümayəndə heyətinin daha əvvəl Qazaxıstan Respublikası Parlamentinin Senatının və Məclisinin sədrləri cənab Maulen Aşimbayev və cənab Yerlan Koşanov ilə, habelə Mərkəzi Seçki Komissiyasının sədri cənab Nurlan Abdirov ilə keçirilən görüşlər barədə məlumat verib. Cənab Ramil Həsən çıxışında TÜRKPA-nın son fəaliyyətlərini qeyd edərək, Türk Dövlətləri Təşkilatının (TDT) və Türk Dövlətləri Parlament Assambleyasının (TÜRKPA) işini əks etdirən parlamentlərarası və hökumətlərarası proseslərin qarşılıqlı əlaqəsini vurğulayıb. Baş katib, həmçinin bu fəaliyyətlərdə Xarici İşlər Nazirliklərinin mühüm rolunu vurğulayıb və Nazirlik tərəfindən bu istiqamətdə göstərilən bütün səylərə görə minnətdarlığını ifadə edib.

Öz növbəsində, cənab Osman Mesten dəvətə görə dərin minnətdarlığını bildirib və dost və qardaş Qazaxıstanda olmaqdan məmnunluq duyduğunu qeyd edib. O, TÜRKPA-nın 2010-cu ildən bəri seçki müşahidə missiyalarında iştirak etdiyini və şəxsən özünün 2018-ci ildən bu missiyalara qatıldığını vurğulayıb.

Cənab Mesten həmçinin qarşıdan gələn referendumun əsas aspektlərini – vitse-prezident vəzifəsinin bərpasını, birpalatalı parlament modeli olan Kurultayın tətbiqini, Qazaxıstan Xalq Maslixatının yaradılmasını və nikahın dövlət tərəfindən qeydə alınan, kişi ilə qadın arasında könüllü və bərabər əsasda qurulan birlik kimi müəyyən edilməsini alqışlayıb.

Bundan əlavə, missiya üzvləri – Azərbaycan Respublikası Milli Məclisinin deputatı Məlahət İbrahimqızı və Qırğız Respublikası Joqorku Keneşinin deputatı Irısbek Atajanov Konstitusiya layihəsində əks olunmuş bir sıra fundamental prinsiplər barədə fikirlərini bölüşüblər.

Görüşdə, həmçinin TÜRKPA Komissiyasının katibi Aynurə Abutalıbova və TÜRKPA-nın Türkiyə Böyük Millət Məclisindəki nümayəndə heyətinin katibi cənab Kürşat Melih Sarıarslan iştirak edib.