TÜRKPA beynəlxalq müşahidəçiləri Beynəlxalq Türk Akademiyasını ziyarət edib

16 mart 2026-cı il tarixində Qazaxıstanda keçirilən konstitusiya referendumunu izləyən TÜRKPA beynəlxalq müşahidəçilərindən ibarət nümayəndə heyəti Beynəlxalq Türk Akademiyasını ziyarət edib.

Ziyarət zamanı Beynəlxalq Türk Akademiyasının prezidenti Prof. Dr. Şahin Mustafayev qonaqları Akademiyanın türk xalqlarının müxtəlif mədəni irsini əks etdirən muzey sərgisi ilə tanış edib. Cənab Mustafayev qurumun əsas fəaliyyət istiqamətləri haqqında ətraflı məlumat verərək, türk dünyasında birliyin möhkəmləndirilməsinə xidmət edən cari elmi layihələr və müxtəlif beynəlxalq təşəbbüslər barədə məlumat verib.

Görüşdə türk dünyasında elmi və mədəni-humanitar əməkdaşlığın genişləndirilməsi məsələləri müzakirə olunub. Qazaxıstanda keçirilən konstitusiya referendumun təkcə bu ölkə üçün deyil, bütövlükdə türk regionu üçün də böyük əhəmiyyət kəsb etdiyi, demokratik təsisatların gücləndirilməsinin regional sabitliyə və qarşılıqlı əlaqələrin inkişafına mühüm töhfə verdiyi xüsusilə vurğulanıb.

Nümayəndə heyətinin üzvləri Akademiyanın fəaliyyətini yüksək qiymətləndirərək türk xalqlarının tarixi, dili və mədəniyyətinin elmi əsaslarla öyrənilməsində bu qurumun müstəsna rolunu vurğulayıblar. Görüşün sonunda Prof. Dr. Şahin Mustafayev davamlı akademik tərəfdaşlığın rəmzi olan Akademiyanın ən son elmi nəşrlərini qonaqlara təqdim edib.

Beynəlxalq müşahidəçilərdən ibarət nümayəndə heyətinin tərkibinə Azərbaycan Respublikası Milli Məclisinin deputatı Məlahət İbrahimqızı, Türkiyə Böyük Millət Məclisinin deputatı Osman Mesten, nümayəndə heyətinin katibi, Türkiyə Böyük Millət Məclisinin Xarici Əlaqələr və Protokol Departamentinin əməkdaşı, Kürşat Melih Sarıaslan, Azərbaycan Respublikası Mərkəzi Seçki Komissiyasının üzvləri Nailə Əsgərova və Elmira Əzizova və TÜRKPA Komissiyasının katibi Aynurə Abutalıbova daxil idi.