ТҮРКПАнын Башкы катчысы Казакстан Республикасынын Конституциялык сотунун Төрайымы менен жолугушту

ТҮРКПАнын Башкы катчысы Элчи Рамил Хасан Казакстан Республикасынын борбору Астана шаарына болгон расмий сапарынын алкагында Казакстан Республикасынын Конституциялык сотунун Төрайымы Эльвира Азимова айым менен жолугушту.

Жолугушуунун жүрүшүндө Эльвира Азимова айым Казакстан Республикасынын Конституциясына киргизиле турган өзгөртүүлөрдү караган жалпы улуттук референдумдун жыйынтыктары тууралуу маалымат берди. Анын айтымында, референдумдун алкагында Конституциянын болжол менен 84 пайызына өзгөртүүлөр киргизилиши каралган. Азимова айым бул реформалар Казакстандын келечектеги өнүгүүсүнө олуттуу салым кошорун белгилеп, мындай жаңылануулар башка түрк мамлекеттердеги реформалык процесстерди колдоо максатында моделдик мыйзамдардын алкагында колдонулушу мүмкүн экендигин белгиледи.

Өз кезегинде Элчи Рамил Хасан мырза жылуу кабыл алуу үчүн Эльвира Азимова айымга ыраазычылык билдирип, Казакстандын бир тууган элин тарыхындагы маанилүү жаңы этап менен куттуктады. Элчи Хасан мырза конституциялык реформаларга багытталган өзгөрүүлөр казак элинин мындан аркы өнүгүүсүнө олуттуу өбөлгө түзөрүнө ишенимин билдирди. Ошондой эле ал парламенттер аралык кызматташтыктын алкагында моделдик мыйзамдар аркылуу Конституцияда чагылдырылган негизги жаңычылдыктарды бардык мүчө мамлекеттердин мыйзам чыгаруу тутумдарына киргизүү өз ара пайдалуу болорун баса белгиледи.

Жолугушууга ТҮРКПА Башкы катчысынын орун басары Талгат Адуов мырза, Казакстан Республикасынын Конституциялык сотунун Төрагасынын орун басары Бакыт Нурмуханов мырза, Эл аралык кызматташтык жана уюштуруучулук камсыздоо департаментинин директору Жанна Назарова айым, аталган департаменттин директорунун орун басары Бибигүл Асылова айым, Даттанууларды алдын ала кароо жана жарандарды кабыл алуу бөлүмүнүн жетекчиси Эльмира Калиева айым, Аналитика жана конституциялык сот өндүрүшү бөлүмүнүн жетекчиси Амир Умаров мырза, ошондой эле Эл аралык кызматташтык жана протокол секторунун жетекчиси Жылдыз Камзина айым катышты.