ТҮРКПА жана Түрк маданияты жана мурасы фонду кызматташтыкты тереңдетүү үчүн Өз ара түшүнүшүү жөнүндө меморандумга кол коюшту

2026-жылдын 11-мартында Түрк маданияты жана мурасы фондунун (ТММФ) Президенти Актоты Райымкулова айым ТҮРКПАнын Эларалык Катчылыгына сылык сапары менен келип, Түрк мамлекеттердин Парламенттик Ассамблеясынын (ТҮРКПА) Башкы катчысы Элчи Рамил Хасан мырза менен жолугушту.

Эки уюмдун кызматкерлеринин катышуусунда өткөн жолугушуунун жүрүшүндө Райымкулова айым Элчи Рамил Хасан мырзаны ТҮРКПАнын Башкы катчысы кызматына шайланышы менен куттуктап, Кыргызстандын учурдагы төрагалыгынын алкагында Түрк маданияты жана мурасы фонду тарабынан ишке ашырылып жаткан демилгелер тууралуу маалымат берди.

Өз кезегинде Элчи Хасан мырза ТММФ делегациясына ТҮРКПА тарабынан жүргүзүлүп жаткан ишмердүүлүк тууралуу маалымат берди. ТҮРКПАнын Эл аралык референдумга байкоо жүргүзүү миссиясы тарабынан 2026-жылдын 15-мартында Казакстанда өтө турган конституциялык референдумга кыска мөөнөттүү байкоо жүргүзүүгө даярдык процессине көңүл бурган Башкы катчы референдумга коюлган Конституциянын долбоорунда Казакстандын институционалдык түзүмүндө олуттуу өзгөрүүлөр каралганын белгилеп, бул референдумдун Казакстан жана жалпы түрк дүйнөсү үчүн маанилүүлүгүн баса белгиледи.

Ошондой эле Башкы катчы ТҮРКПАнын кызматташтыктын ар кандай багыттарында иш алып барган туруктуу комиссиялары тууралуу маалымат берип, тиешелүү туруктуу комиссиянын алкагында маданий мураска байланыштуу моделдик мыйзамдарды иштеп чыгуу жаатында эки уюмдун кызматташуу мүмкүнчүлүктөрүнө көңүл бурду. Ал ТҮРКПАнын түрк кызматташтыгынын мыйзам чыгаруу багытындагы негизги тиреги катары ролуна токтолуп, эки уюмдун ортосундагы кызматташтык демилгелерин колдоого даяр экенин билдирди.

Жолугушуунун жүрүшүндө тараптар түрк мамлекеттердин ортосундагы кызматташтыкты чыңдоо үчүн натыйжалуу мыйзамдык базаны түзүүнүн стратегиялык маанилүүлүгүн баса белгилешти. Ушуга байланыштуу Райымкулова айым ТҮРКПА делегациясын Түркиянын Газиантеп шаарында 2026-жылдын апрель айында өтө турган «Түрк маданий мурасы: маданий баалуулуктардын мыйзамсыз жүгүртүүсүнө каршы күрөшүү» боюнча Стратегиялык кызматташтык конференциясына жана техникалык семинарга катышууга чакырды.

Жолугушуунун соңунда түрк мамлекеттердин ортосундагы маданий жана саясий байланыштарды өнүктүрүүгө, ошондой эле биргелешкен демилгелерди ишке ашыруу аркылуу түрк маданий жана саясий мурасын региондук жана эл аралык деңгээлде жайылтууга багытталган "Өз ара түшүнүшүү жөнүндө меморандумга" кол коюу аземи болуп өттү.