Казакстандын Парламентинин Сенатынын Төрагасы ТҮРКПАнын Эл аралык референдумга байкоо жүргүзүү миссиясын кабыл алды

2026-жылдын 13-мартында Башкы катчы Элчи Рамил Хасан мырза жана ТҮРКПАнын Укуктук маселелер жана эл аралык байланыштар боюнча комиссиясынын Төрагасы, Түркия Улуу Улуттук Жыйынынын депутаты Осман Местен мырза жетектеген Азербайжан, Кыргызстан жана Түркиянын парламентарийлеринен, парламенттердин аппараттарынын өкүлдөрүнөн жана ТҮРКПАнын Эл аралык Катчылыгынын өкүлдөрүнөн турган Эл аралык референдумга байкоо жүргүзүү миссиясы Казакстандагы жаңы Конституциянын долбоору боюнча өткөрүлө турган референдумга кыска мөөнөттүү байкоо жүргүзүүнүн алкагында Казакстандын борбору Астана шаарындагы расмий жолугушууларын баштады.

Бул жолугушуулардын алкагында делегация Казакстан Республикасынын Парламентинин Сенатынын Төрагасы Маулен Ашымбаев мырза менен жолугушту. Жолугушуунун жүрүшүндө Маулен Ашымбаев мырза делегацияга мындай маанилүү миссия менен Казакстанга келгендиги үчүн ыраазычылык билдирди. Ал Казакстанда жүргүзүлүп жаткан реформалар, айрыкча Конституцияга сунушталган олуттуу өзгөртүүлөр жана 15-мартка белгиленген референдум тууралуу кеңири маалымат берип, бул өзгөрүүлөр өлкөнүн келечегине, өнүгүшүнө жана демократиялык институттарынын чыңдалышына олуттуу салым кошорун белгиледи. Ошондой эле ал бул процесс Казакстандын тарыхындагы маанилүү этаптардын бири болуп саналарын жана азыркы дүйнөдөгү глобалдык өзгөрүүлөрдүн ажырагыс бөлүгү экенин баса белгиледи.

Сенаттын Төрагасы Казакстан бардык түрк мамлекеттер менен мамилелерди мындан ары да өнүктүрүп, бекемдөөнү улантарын жана түрк дүйнөсүнүн алкагындагы кызматташтыкты тереңдетүүгө багытталган бардык демилгелерди туруктуу колдой турганын билдирди.

Өз кезегинде ТҮРКПАнын Укуктук маселелер жана эл аралык байланыштар боюнча комиссиясынын Төрагасы Осман Местен мырза Маулен Ашимбаев мырзага жылуу кабыл алгандыгы үчүн терең ыраазычылык билдирди. Ал ТҮРКПА 2010-жылдан бери мүчө мамлекеттердеги бардык шайлоо процесстерине жана референдумдарга эл аралык байкоочу миссия катары туруктуу катышып, аларга тыкыр байкоо жүргүзүп келе жатканын белгиледи.

Азербайжан Республикасынын Милли Межлисинин депутаты Малахат Ибрагимгызы айым жана Кыргыз Республикасынын Жогорку Кеңешинин депутаты Ырысбек Атажанов мырза боордош Казакстанга референдумдун ийгиликтүү өтүшүн каалашты. Алар добуш берүү демократиялык принциптердин негизинде өткөрүлөрүнө ишеним билдирип, Эл аралык байкоочу миссиянын курамында бул процесске катышып жатканына канааттануусун билдиришти.

Өз кезегинде Элчи Рамил Хасан Маулен Ашымбаев мырзага 2010-жылдан бери уланып келе жаткан жемиштүү кызматташтык үчүн ыраазычылык билдирди. Башкы катчы Маулен Ашымбаев мырза 2011-жылдан тартып Сенаттын Эл аралык мамилелер, коргоо жана коопсуздук боюнча комитетинин Төрагасы катары иштеп келген мезгилден бери ТҮРКПАнын ишмердүүлүгүнө ар тараптуу колдоо көрсөтүп, эл аралык кызматташтыкты чыңдоого олуттуу салым кошуп келе жатканын белгиледи. Ошондой эле Элчи Рамил Хасан жаңы Конституцияда Казакстандын Парламентин байыркы түрк сөзү болгон «Курултай» деп атоо түрк дүйнөсү үчүн терең символдук жана тарыхый мааниге ээ экенин баса белгиледи.

Башкы катчы келечектеги Курултай менен кызматташтык мындан ары дагы бекемделерин белгилеп, ТҮРКПАнын ЕККУнун Парламенттик Ассамблеясында байкоочу статусун алуу боюнча акыркы жетишкендиктер тууралуу маалымат берди. Жолугушуунун жүрүшүндө Элчи Рамил Хасан мырза 2026-жылдын 16-апрелинде Стамбул шаарында Парламенттер аралык Бирликтин 152-пленардык отурумунун алкагында өтө турган жогорку деңгээлдеги иш-чара тууралуу маалымат берди. Ал Түркия Улуу Улуттук Жыйынынын Төрагасы профессор-доктор Нуман Куртулмуштун кабыл алуусунда өтө турган ТҮРКПАга мүчө парламенттердин төрагаларынын алгачкы бейрасмий жолугушуусу тууралуу кеңири маалымат берип, Азербайжан, Кыргызстан жана Венгриянын парламенттеринин төрагалары бул иш-чарага катышууга оозеки макулдугун бергенин билдирди. Ошондой эле Башкы катчы Казакстандын ТҮРКПАга учурдагы төрагалыгынын алкагында бул жолугушууга катышуусунун өзгөчө маанисин белгиледи.

Өз сөзүнүн соңунда Башкы катчы «Күчтүү Казакстан – күчтүү түрк дүйнөсү» деген маанилүү ойду баса белгилеп, боордош өлкөгө келечектеги бардык иш-аракеттерине ийгиликтерди каалады. Ошону менен катар ал 2026-жылдын 30-январында белгиленген Казакстан Республикасынын Парламентинин 30 жылдык мааракеси менен Маулен Ашымбаев мырзаны куттуктап, куттуктоо тексти чегилген атайын даярдалган эстелик белекти тапшырды.

Жолугушууга ошондой эле ТҮРКПАнын Эл аралык Катчылыгынан Башкы катчынын орун басары Талгат Адуов мырза, Комиссиянын катчысы Айнура Абуталибова айым жана Уюштуруу жана административдик маселелер боюнча катчы Алескер Агаев мырза катышты.