TÜRKPA Baş katibi Qazaxıstanın fəaliyyətdə olan sədrliyi çərçivəsində Qazaxıstanın Parlamenti Məclisinin Beynəlxalq əlaqələr, müdafiə və təhlükəsizlik komitəsinin sədri ilə onlayn görüş keçirib

2 Mart 2026-cı il tarixində TÜRKPA Baş katibi cənab Ramil Həsən Qazaxıstanın fəaliyyətdə olan sədrliyi çərçivəsində Qazaxıstan Parlamenti Məclisinin Beynəlxalq əlaqələr, müdafiə və təhlükəsizlik komitəsinin sədri xanım Aygül Kuspanla onlayn formatda görüş keçirib.

Baş katib xanım Kuspana görüşün təşkili təşəbbüsü üçün dərin minnətdarlığını bildirərək, qardaş Qazaxıstanda aparılan konstitusiya islahatlarını tam dəstəklədiyini qeyd edib. O, yeni Konstitusiyanın qardaş ölkədə rifahın və sabitliyin daha da möhkəmləndirilməsinə töhfə verəcəyinə əminliyini ifadə edib. Cənab Ramil Həsən qarşıdan gələn islahatların təkcə Qazaxıstan üçün deyil, həm də bütün türk dünyası üçün xüsusi əhəmiyyət kəsb etdiyini vurğulayıb. Bu baxımdan, o, TÜRKPA-nın Qazaxıstanın üç şəhərində - Astana, Almatı və Türküstanda keçiriləcək konstitusiya referendumunu müşahidə edəcəyini qeyd edib.

Görüş zamanı Baş katib Qazaxıstanın fəaliyyətdə olan sədrliyi çərçivəsində TÜRKPA-nın referendum prosesinin şəffaflığına töhfə vermək üçün bütün lazımi dəstəyi göstərməyə hazır olduğunu bildirib.

Baş katib, həmçinin TÜRKPA nümayəndə heyətinin ATƏT Parlament Assambleyasının (ATƏT PA) 25-ci qış sessiyası çərçivəsində Avstriyanın paytaxtı Vyana şəhərinə səfəri barədə məlumat verib. O, səfər zamanı türk dövlətlərinin nümayəndə heyətləri ilə görüşlərin keçirildiyini və TÜRKPA-nın ATƏT PA-da müşahidəçi statusu üçün müraciət prosesinin uğurla başa çatdığını qeyd edib. Bu kontekstdə o, regional və beynəlxalq əməkdaşlıqda əsas tərəfdaş kimi bu təşəbbüsə dəstək verən Qazaxıstan Respublikasının mühüm töhfəsini vurğulayıb.

Öz növbəsində, xanım Aygül Kuspan Baş katibə yeni parlament sistemi çərçivəsində gözlənilən dəyişikliklər barədə məlumat verib. O, yeni sistemin Qazaxıstan Parlamentində hesabatlılığı və səmərəliliyi daha da gücləndirəcəyinə ümid etdiyini bildirib.

Xanım Kuspan, həmçinin TÜRKPA Beynəlxalq Katibliyinin üzv dövlətlərin nümayəndələri ilə birgə beynəlxalq müşahidə missiyasının bir hissəsi olaraq konstitusiya islahatına dair referendumun qısamüddətli müşahidəsi prosesində iştirakını alqışlayıb. O, onların iştirakının prosesin şəffaflığı, açıqlığı və etibarlılığı baxımından mühüm töhfə verəcəyini vurğulayıb.

Görüş zamanı tərəflər eyni zamanda Qazaxıstanın fəaliyyətdə olan sədrliyi çərçivəsində TÜRKPA-nın hüquqi sənədlərinin təkmilləşdirilməsinin yekunlaşdırılmasının əhəmiyyətini müzakirə ediblər. Həmçinin, cari ilin aprel ayında İstanbulda keçirilməsi planlaşdırılan TÜRKPA Üzv Parlamentlərinin rəhbərlərinin qeyri-rəsmi görüşünün parlamentlərarası dialoq və əməkdaşlığın gücləndirilməsi üçün yüksək səviyyəli platforma kimi əhəmiyyətini xüsusi qeyd ediblər.

TÜRKPA Beynəlxalq Katibliyindən, həmçinin Baş katibin müavinləri Talqat Aduov və Muhammet Alper Hayali, Komissiya katibləri Aynurə Abutalibova, Bauırjan Datkayev, Aygerim Taalaybekova və Kadir Yaman, Protokol xidmətinin rəhbəri Yadigar Məmmədov, Hüquq məsələləri üzrə mütəxəssis Azər Məmmədov, Baş katibin köməkçisi Tahmina Bakiyeva, Araşdırma üzrə mütəxəssis Kamila Müzəffərli və İctimaiyyətlə əlaqələr üzrə mütəxəssis Fidan Məcidli iştirak ediblər.

Görüşdə Qazaxıstan Parlamenti Məclisinin aparatının müavini Talqat Kasımbekov və Beynəlxalq əlaqələr və protokol departamentinin sektor müdiri Aray Bekenov da iştirak edib.