TÜRKPA Beynəlxalq Seçki Müşahidə Missiyası Almatıda siyasi partiya nümayəndələri ilə görüşlər keçirir

2026-cı ilin 20-21 avqust tarixlərində TÜRKPA Beynəlxalq Seçki Müşahidə Missiyasının Almatı qrupu 23 avqust 2026-cı il tarixinə təyin edilmiş Qazaxıstanda parlament seçkilərinin qısamüddətli müşahidəsinin bir hissəsi kimi seçkilərdə iştirak edən siyasi partiyaların nümayəndələri ilə görüşlər keçirib.

Missiya üzvləri "Ak Jol" Qazaxıstan Demokratik Partiyası, "Baytak" Qazaxıstan Yaşıllar Partiyası, "Respublica" Partiyası, Qazaxıstan Xalq Partiyası, "Auıl" Partiyası və "Adilet" Partiyasının nümayəndələri ilə görüşüblər.

Görüşlər zamanı siyasi partiyaların nümayəndələri Missiya üzvlərinə öz seçki platformaları, seçkiqabağı mühit haqqında fikirləri və qarşıdan gələn parlament seçkilərindən gözləntilərinə dair məlumat veriblər.

TÜRKPA Beynəlxalq Seçki Müşahidə Missiyası öz müşahidəsini Qazaxıstan Respublikasının Astana və Almatı şəhərlərində həyata keçirir. TÜRKPA Beynəlxalq Seçki Müşahidə Missiyasının Almatı Qrupunun tərkibinə Azərbaycan Respublikası Milli Məclisinin deputatı cənab Hikmət Məmmədov, Qırğız Respublikası Joqorku Keneşinin deputatı cənab Ulukbek Karıbek Uulu, Türkiyə Böyük Millət Məclisinin deputatı xanım Filiz Kılıç, TÜRKPA Baş katibinin müavini vəzifəsini icra edən cənab Bektur Bazakeçov, TÜRKPA-nın komissiya katibi cənab Kadir Yaman, TÜRKPA Beynəlxalq Katibliyinin hüquq məsələləri üzrə mütəxəssisi cənab Azər Məmmədov və nümayəndə heyəti katibi, Türkiyə Böyük Millət Məclisinin Xarici əlaqələr və protokol şöbəsinin əməkdaşı cənab Yunus Emre Ünal daxildir.