ТҮРКПА Бас хатшысының орынбасары «Мажар-әзербайжан этникалық тамырлары» кітабының таныстырылымына қатысты

2026 жылғы 10 маусымда ТҮРКПА Бас хатшысының орынбасары Талғат Әдуов Түркі мәдениеті және мұрасы қорының штаб-пәтерінде Қор ұйымдастырған «Мажар-әзербайжан этникалық тамырлары» кітабының таныстырылым рәсіміне қатысты.

Іс-шараға дипломатиялық миссиялардың, халықаралық ұйымдардың өкілдері, парламентшілер, академиялық орта мен мәдениет мекемелерінің өкілдері қатысты.

Түркі мемлекеттері ұйымы Ақсақалдар кеңесінің мүшесі, көрнекті мемлекет қайраткері, Елші Гасан Гасановтың авторлығымен дайындалып, Түркі мәдениеті және мұрасы қоры тарапынан жарық көрген кітап әзербайжан және мажар халықтары арасындағы тарихи, тілдік және мәдени байланыстарды зерделейді, сондай-ақ олардың ежелгі түркі дәстүрлерінен бастау алатын ортақ мұрасы мен терең тарихи байланыстарын айқындайды.