Бішкекте ТҮРКПА Кеңесінің отырысы өтті

2026 жылғы 19 қазанда Бішкек қаласында Түркі мемлекеттерінің Парламенттік Ассамблеясының (ТҮРКПА) он бесінші жалпы отырысы аясында Қырғыз Республикасы Жогорку Кенешінің ұйымдастыруымен ТҮРКПА Ассамблеясы Кеңесінің он бесінші отырысы өтті.

Отырысқа Кеңес мүшелері – Әзербайжан Республикасы Милли Мәжілісінің Төрайымы Сахиба Гафарова, Қазақстан Республикасы Құрылтайының Төрағасы Айбек Дадебай, Қырғыз Республикасы Жогорку Кенешінің Төрағасы Марлен Маматалиев, Түркия Ұлы Ұлттық Мәжілісінің Төрағасы Нуман Куртулмуш, сондай-ақ ТҮРКПА Бас хатшысы, Елші Рамиль Гасан қатысты.

Отырыс ТҮРКПА-ның қолданыстағы төрағасы, Қазақстан Республикасы Құрылтайының Төрағасы Айбек Дадебайдың кіріспе сөзімен ашылды. Одан кейін ТҮРКПА-ға төрағалық ету өкілеттігін Қазақстан Республикасы Құрылтайынан Қырғыз Республикасы Жогорку Кенешіне ресми түрде тапсыру рәсімі өтті.

Отырыс барысында парламент төрағалары мен ТҮРКПА Бас хатшысы сөз сөйледі.

Қырғыз Республикасы Жогорку Кенешінің Төрағасы Марлен Маматалиев ТҮРКПА-ға төрағалық ету өкілеттігін қабылдап, Ассамблеяның жаңа төрағасы ретінде құттықтау сөз сөйледі.

Кеңес күн тәртібіндегі бірқатар мәселелер бойынша шешімдер қабылдады. Атап айтқанда, ТҮРКПА-ның сайлауды байқау миссиялары қорытынды есептерінің жобаларын, 2027 жылға арналған бюджет жобасын, он бесінші жалпы отырыстың Бішкек декларациясының жобасын мақұлдау, 2027 жылға арналған Іс-шаралар жоспарын қабылдау, сондай-ақ тұрақты комиссиялардың төрағалары мен төраға орынбасарлары, Бас хатшының орынбасарлары лауазымдарына ұсынылған кандидатураларды бекіту және комиссия хатшыларын сайлау мәселелері қаралды.

Отырыс қорытындысы бойынша Мирлан Усенканов ТҮРКПА-ның Білім, мәдениет, әлеуметтік және гуманитарлық мәселелер жөніндегі комиссиясының хатшысы болып сайланды. Айнура Абуталибова ТҮРКПА-ның Қоршаған орта, табиғи ресурстар және денсаулық сақтау мәселелері жөніндегі комиссиясының хатшысы, ал Бауыржан Датқаев ТҮРКПА-ның Экономикалық ынтымақтастық жөніндегі комиссиясының хатшысы болып қайта сайланды.